Nagpaandam ang Simbahan batok sa nagalapta nga mentalidad sang mga tawo subong nga amo ang sobra-sobra nga pagsalig sa kaugalingon ukon “self-sufficiency.”
Ini ang nangin sentro sang homily ni Reverend Father Julius Almeria, ang Team Ministry Priest sa Jaro Metropolitan Cathedral, sa iya misa subong nga adlaw, Hulyo 5.
Suno kay Almeria, kalabanan sang karakter sang tawo nga may “self-sufficiency” amo ang pagpakuno-kuno nga nahibaluan sini ang tanan. Ini nga tawo ang may tuman man nga pagsalig sa iya kaugalingon nga kaalam, gahum, kag manggad.
Pahayag sini, ini nga mga kinaiya nagaresulta sa “entitlement” bangud sa pagpati nga madamo na ini sang nahibaluan kag nagabatyag man nga nagakabagay siya para sa tanan nga pribelihiyo.
Dugang pa sang Simbahan, ang mas delikado pa nga bahin sang “self-sufficiency” kag “entitlement” amo ang bugal nga amo ang pat-od nga magapa-bulag sang korason sang isa ka tawo.
Nagpaandam man si Almeria nga bangud sa “self-sufficiency”, nagasulod man ang mentalidad nga ma-kontrol sang isa ka tawo ang iya kaugalingon nga kabuhi; kag kun mag-abot na ang kabudlayan kag pagpanghangkat, gilayon nga nagakarumpag ini nga sahi sang ilusyon.
Ginpahanumdom sini sa mga tumuluo nga dapat sundon ang disposisyon sang isa ka bata nga nagasalig sa sarang mahatag sang iya iloy ukon amay.
Sa sini nga konteksto, dapat suno sa Simbahan nga may mentalidad nga nagasalig sa Ginuo nga amo ang may kaalam labaw sa tanan, kag amo ang magabulig sa katawhan sa tion sang mga pagpanghangkat.
“Si Jesus nagasiling, ‘Come. Come to Me.’ Kag ngaa mapalapit kita sa Iya? Kay bangud siya ang aton Diyos. Kay tungod Siya ang aton Diyos, kun magpalapit kita sa Iya, we find rest. The rest He offers is not the absence of difficulties, but the presence, His presence,” suno kay Almeria.
Pahayag sini, paagi sa pagpalapit sa Ginuo, wala ini nagakahulugan nga madula na ang mga palas-anon ukon problema sang mga tawo.
“Ara dira ang aton problema, pero mangin mamag-an ina bangud ara kita sa presensya sang Diyos, kay kun ara kita sa presensya sang Diyos, makapanumdom kita nga indi lang kita ang nagadala sang aton problema kundi ang Diyos, kaupod naton,” dugang sini sa iya nga homily.
