Sa pagbukas sang impeachment trial ni Vice President Sara Duterte subong nga adlaw ginalauman nga magapokus anay ang senado sa mga pamaagi kag proseso sini.
Suno kay Surigao del Norte Representative Robert Ace Barbers ang adviser kag spokesperson sang House prosecution panel nga wala anay sang ipatawag nga mga testigo ukon ipresentar nga mga ebidensya.
Suno kay Barbers, pagatalakayon anay sang Senate impeachment court ang mga pagsulundan sa bug-os nga trial, lakip na ang pagpakilala sang mga abogado, pagpresentar sang plea ni Duterte, kag iban pa nga inisyal nga legal nga mga isyu agud masiguro ang husto kag organisado nga dalagan sang kaso.
Dugang pa niya, handa na ang prosecution sa pagpresentar sang ila mga ebidensya kag mga testigo sa tion nga matapos na ang mga pagpresentar sang korte sa dapat sundon sa trial.
Ginpunto man sini nga ang desisyon sa impeachment trial magabase sa mga ebidensya, sa Konstitusyon, kag sa mga kamatuoran, kag indi sa mga pahayag nga para lamang magasimpatiya sang suporta sang publiko.
Nahibaluan nga magaatubang si Duterte sa trial subong nga adlaw bangud sang mga alegasyon nga nagalakip sang gina-alegar nga sala nga paggamit sang Bise Presidente sa P612.5 milyon nga confidential funds, paglapas sa Konstitusyon, nagasobra nga manggad sini, kag iban pa nga mga nagkalain-lain nga kaso nga ginapangatubang sini.
