Ginpaanggid ni Jaro Archbishop Midyphil B. Billones ang tunog sang drum sang Bombo Radyo bilang simbolo sang kamatuoran kag pagserbisyo, kadungan sang panawagan nga himuon nga pinakamataas nga basehan sang media ang paghigugma.
Sa iya nga mensahe para sa ika-60 anibersaryo sang Bombo Radyo Philippines, ginsiling ni Billones nga sa kada tion nga mabatian niya ang pagpaltog sang drum sang Bombo Radyo, gilayon nga ginalauman sang mga tawo ang pagdul-ong sang balita nga makabulig sa ila.
Suno sa arsobispo, apisar hugot ang kompetisyon sa industriya sang media, ang “paghigugma gihapon” ang dapat mangibabaw, santo sa mensahe ni San Pablo sa Una nga Sulat sa mga Taga-Corinto nga nagasiling nga wala sang pulos ang ano man nga pamaagi sang pagpakig-istorya kun wala sang paghigugma.
Ini suno sa iya ang klase sang paghigugma nga ginapakita sang kada hampak sang drum sang Bombo sa bilog nga pungsod nga nagadul-ong sang balita nga nagasandig sa kamatuoran, pag-ulikid sa isigkatawo kag pagpangalagad sa komunidad.
