Magapabilin nga hepe sang Iloilo City Police Station (ICPS) 4 si PCapt. Ryan Christ Inot suno sa Police Regional Office (PRO) 6 apisar sang nagluntad nga insidente sa tunga sang Molo PNP kag PNP Integrity Monitoring Enforcement Group (IMEG) sang nagligad nga Hulyo 1.
Pagpaathag ni Police Regional Office (PRO-6) Director PBGen. Randulf Tuaño, wala sang rason agud i-relieve sa pwesto si PCapt Inot bangud indi man ini suspek sa krimen kag wala man sang may ginhimu nga malain.
Suno kay PBGen Tuaño, iga-relieve lang ang isa ka hepe kun siya ang mismo na-involve sa krimen ukon insidente.
Pahayag niya ang nasambit nga operation sang IMEG, ang dismissed police officer ang ila target kag indi ang mga hepe ukon police personnel sang Molo PNP
Ginpahayag man sini nga wala sang pormal nga reklamo batok kay PCapt Inot kasunod sang mga alegasyon pareho sang planted drugs kag paggamit sa ex-police Jerry Villanueva sa police operations sa ICPS 4 rason nga wala sang basehan agud i-relieve ini sa pwesto.
Apang, ginklaro ni PBGen Tuaño nga nagapadayon sa gihapon ang imbestigasyon sang Regional Investigation and Detective Management Division (RIDMD) angut sa nagluntad nga insidente kag mga nasambit nga alegasyon kun sa diin kun mapamatud-an nga may yara sang naglapas sa layi sang PNP, pagasiguradohon sang PRO 6 nga pasabton sang criminal kag administrative ang mga ini.
Ginpasiguro man sini nga tanan nga mga alegasyon batok sa police personnel sang PRO 6 ang magaagi sa tsakto nga proseso kag indi pagdali-dalion nga kakson ang mga ini sa pwesto ilabi na kun wala sang pormal nga nga reklamo agud nga masiguro nga mapabilin ang moral sang mga kapulisan.
Dugang pa nga pagpaathag ni PBGen Tuaño nga gilayon man ini nag-koordinar sa PNP IMEG matapos ang natabo nga insidente agud mahibaluan man ang bahin sang mga ini kag ginpahayag niya nga gikan sa Regional Office ang personnel sang IMEG nga nagsulod sa estasyon sang Molo PNP kag indi sa Central Office.
