Nagdangop sa Bombo Radyo agud klaruhon ang iya pangalan ang lalaki nga gintudlo nga kakuntsabo sang ginbansagan nga “notoryus” nga scammer nga si Nullah Gonzales ukon mas kilala nga si Febe Anne Amaguin Yap.
Ini amo si Jobert Rodriguez nga residente sang San Pedro, Molo kag live-in partner ni Yap.
Kahapon sang una nga nagpadulong sa Bombo Radyo ang taxi driver nga si Rodolfo Dilapuz Jr. nga nag-alegar nga ginbiktima man ini ni Yap kag gintudlo si Rodriguez nga amo ang kahimbon sang ginbansagan hangkilan nga estapador.
Sa interview sang Bombo Radyo kay Rodriguez, gin-ako sini nga nag-updanay sila ni Yap sa isa lang ka balay sa sulod sang isa ka tuig kag lima ka bulan.
Suno sa iya, samtang nagaupdanay bilang magkarelasyon, wala gid ini sang ihibalo sa iligal nga aktibidad nga ginahimo ni Yap.
Pahayag niya, nagpakilala si Yap sa iya sadto bilang si Nullah Gonzales matapos nga nangin pasahero niya ini sang nagatrabaho pa si Rodriguez bilang rider.
Ginsiling ni Rodriguez nga humalin sadto, nangin regular na niya nga customer si Yap.
Panaysayon pa ni Rodriguez, masami na sila nagakit-anay ni Yap tubtob nga mismo ang babaye mismo ang nagtanyag nga mag-updanay na lang sila sa balay sang babaye sa isa ka subdivision sa Pavia.
Suno kay Rodriguez, ginsiling ni Yap nga siya ang tag-iya sang balay apang sang naulihi, nadiskubre man niya nga ginrentahan lamang ini ni Yap.
Pahayag niya, siyam ka bulan sila nga nag-upod sa Pavia tubtob nga nakasaylo sila sa Alta Tierra Village, Jaro.
Gintuad man ni Rodriguez nga isa man sa negosyo ni Yap amo ang pagpatigayon sang mga kliyente nga luyag magrenta sa mga apartments.
Sa dalayon, didto na amat-amat sini naobserbahan nga madamo sang nagareklamo nga apisar nakabayad na kay Yap, wala pa sila sa gihapon nakasaylo sa ginarentahan nga mga apartments nga amo ang ginantanyag ni Yap.
Didto na nagduda si Rodriguez sa mga transakyon sang iya live-in partner.
Nagdako pa gid ang pagduda ni Rodriguez sang ginsiling ni Yap nga nagabusong ini kag siya ang amay apang sang iya gin-check sa ospital kun sa diin ginpahayag nagpakonsulta si Yap, wala ini sang record.
Kasunod sini, ginsukmaan niya si Yap kag didto na sila nag-inaway, kag sang Hunyo 26, wala na nagpauli si Rodriguez sa ila ginaistaran ni Yap sa Jaro.
Kahapon, matapos malantawan sa Bombo Radyo ang mga panaysayon ni Dilapuz, didto na napat-ud ni Rodriguez ang mga iligal nga modus ni Yap.
Kumbinsido man si Rodriguez nga may relasyon man kanday Yap kag Dilapuz bangud sa pila ka mga videos nga iya nakit-an.
Suno kay Rodriguez, nagalain gid ang iya buot bangud ginpalangga niya si Yap apang gin-gamit lang siya sini para sa mga iligal sini nga mga buluhaton agud makakwarta.
Plano na lang subong ni Rodriguez nga kwaon na lang sini ang mga gamit niya sa balay ni Yap.
Desidido naman ini nga indi na magpainto pa liwat sa hangkilan nga scammer bisan pa nga ginpalangga niya ini.
