Labing maayo gid para kay Vice President Sara Duterte nga magtambong sa nagapadayun sini nga impeachment trial suno kay House Prosecutor Rep. Janette Garin.
Kasunod ini sa wala sa gihapon pagtambong ni Duterte sa ikaduha nga adlaw sang trial sa senate impeachment court.
Sa interview sang Bombo Radyo kay Garin, iya ginpahayag nga ginkalipay gid tani nila ang pag-abot sang bise presidente sa senado sa pagpati nga nagkadto ini para sabton ang mga alegasyon sa iya impeachment trial, apang napaslawan lamang sila bangud ginbisita lamang sini ang iya nga defense team.
Suno man sa Kongresista, ginarespeto man nila ang desisyon ni Duterte ilabi na nga indi man required ang iya presensya kun yara man ang defense team nga magapresentar para sa iya.
Dugang man ni Garin, mas maayo gid tani nga ang bise presidente mismo ang isa sa magadepensa sang iya kaugalingon ilabi na nga nagatutok gid ang publiko sa mga hitabo sa iya trial kun sa diin mahibaluan man kun sino ang nagasugid sang kamatuoran.
