Rep. Garin, nagapati nga ginalikawan lang sang defense team ang pila ka topiko sa tria

Klaro para kay House Deputy Speaker kag Iloilo 1st District Rep. Janette Garin nga gina-ubra lamang nga pangontra sang Defense team ang mga “objections” sa impeachment trial ni Vice President Sara Duterte agud malikawan nga maisturyahan ang mga ginapresenta nga topiko sang House Prosecution team.

May kaangtanan ini sa makapila ka beses nga pagpa-untat ni defense counsel Atty. Carlo Narvasa kay Prosecution counsel Atty. Amando Ligutan, samtang ginapamangkut sini ang una nga ginpakilala nga testigo nga si National Bureau of Investigation (NBI) agent John Mark Calilung.

Si Ligutan amo ang nagpanguna nga abogado sa impeachment article nahanungod sa grave threats sang bise presidente batok sa first family kag kay anay House Speaker Romualdez.

Sa interview sang Bombo Radyo kay Rep. Garin, iya ginpahayag nga indi ini isa ka solusyon agud mapunggan nga diskusyunan sa senate impeachment court ang isa ka isyu batok sa opisyal.

Gindayaw man sang kongresista ang tanan nga mga senador nga kabahin sang nasambit nga trial bangud makit-an suno sa iya ang husto kag patas nga pagtratar sa defense kag prosecution team.