Ginpaiway anay sang prosecution panel ang pag-presentar sang ila ikaduha nga testigo tubtob sa Lunes nga adlaw, Hulyo 13.
Ini man ang rason kun ngaa mas maaga nga natapos ang ikatatlo nga adlaw sang impeachment trial batok kay Vice President Sara Duterte.
Nahibaluan nga sa una nga adlaw sang trial, ginpatawag sang prosekusyon bilang mga testigo sanday National Bureau of Investigation (NBI) senior agent John Mark Calilung kag NBI Regional Director Atty. Jeremy Lotoc.
Apang matapos ang cross-examination sang kampo sang depensa kay Calilung sa ikatatlo nga adlaw sang trial, ginpahayag ni prosecution counsel Atty. Amando Virgil Ligutan nga sa masunod nga hearing na lamang nila ipresentar si Lotoc.
Suno kay Ligutan, si Calilung lamang ang ila ipresentar nga testigo kahapon anga adlaw, samtang si Atty. Jeremy Lotoc ang ipresentar sang prosekusyon sa Lunes.
Ginpahayag man sini nga luyag sang prosekusyon nga magamit ang kabilugan nga 11 ka adlaw nga ginhatag para sa pagpresentar sang ila ebidensya may kaangtanan sa Article IV sang impeachment complaint.
Ang Article IV natuhoy sa alegasyon nga pagpamahog ni Duterte nga ipapatay si President Ferdinand Marcos Jr., First Lady Liza Araneta-Marcos, kag anay House Speaker Martin Romualdez.
Si Calilung ang nanguna sa imbestigasyon sang mga pahayag sang bise presidente, samtang si Lotoc ang mangin kabahin naman sang imbestigasyon kun may ginkuha gid man nga assassin si Duterte.
Pagkatapos sang manifestation sang prosekusyon, gin-adjourn ni Senate impeachment court presiding officer kag Senator-judge Francis “Chiz” Escudero ang hearing kun sa diin nagtapos ang una nga semana sang impeachment trial.
