Gin-athag sang isa ka Bombo Abogado nga wala naga-apply sa paggamit sang kwarta ang nangin pahayag sang House Private Prosecutor nga si Atty. Amando Ligutan nga “A printed version of an electronic copy is an original.”
Ini may kaangtanan sa pagpresentar sang ebidensya sa korte sa nagapadayon nga impeachment trial ni Vice President Sara Duterte.
Sa interview sang Bombo Radyo kay Atty. Noel Palomado, iya ginpahayag nga sa korte, mahimo nga batunon ang photocopy, duplicate ukon xerox copy magluwas sa orihinal nga dokumento.
Pahayag pa sini nga ginagamit man ini nga proseso kun wala na nauyatan ang orihinal nga kopya sang dokumento ilabi na kun kinahanglan bilang evidence tools kag wala ini sang paglapas sa pagsulundan sang konstitusyon.
Ginklaro man ni Atty. Palomado nga ilegal ang pag-photocopy, pag-scan ukon pag-print sang bisan ano nga kwarta bangud makonsiderar nga may ara sang criminal violations ang bisan sin-o nga magahimo sini kag possible nga magabayad sang dako nga penalidad.
Pahayag pa ni Palomado nga dapat mangin responsable ang publiko sa pagbaton sang impormasyon kag indi gilayon nga magpati sa makita sa social media.
Dugang pa sini nga mas maayo nga usisaon anay kun ano ang matuod agud malikawan ang paglapta sang sala nga impormasyon kag ang paglapas sa pagsulundan sang layi.
