Arestado ang tatlo ka mga persona sa ginpatigayon nga buy-bust operation sang Criminal Investigation and Detection Group (CIDG) Iloilo City kaupod ang Iloilo City Police Station 9 kahapon nga adlaw.
Ini matapos madakpan nga nagabaligya kag naga-refill sang mga butane canister gamit ang LPG sa Barangay San Isidro, Jaro, Iloilo City.
Ginkilala ang mga nadakpan nga sanday Leopoldo, 69 anyos; Leo Paulo, 43 anyos, lunsay residente sang Barangay Tabuc Suba, Jaro; kag Jayson, 34 anyos, residente sang Barangay Naclub, Miag-ao, Iloilo.
Suno sa CIDG, ginpatigayon ang operasyon pasado alas-11:00 sang aga tubtob ala-1:00 sang hapon matapos ma-monitor ang iligal nga aktibidad kag makakuha sang pre-operational clearance.
Narekober sa operasyon ang buy-bust money, anom ka butane canister nga may sulod nga LPG nga gin-subject sa transaksyon, anom ka 11-kilogram nga LPG tanks, 13 ka wala sulod nga LPG tanks, lima ka kahon sang butane canisters nga may tig-24 ka bilog kada kahon, 100 ka wala sulod nga butane canisters, walo ka improvised refilling kits kag duha ka digital weighing scales.
Ginabanta nga naglab-ot sa kapin P60,000 ang balor sang mga nakumpiskar nga ebidensya.
Mahimo pasakaan sang kaso nga paglapas sa Republic Act No. 11592 ukon LPG Industry Regulation Act ang tatlo ka subject.
