Naka-stand by kag padayon nga gina-monitor sang Iloilo City Disaster Risk Reduction and Management Office (CDRRMO) ang posible nga epekto sang Bagyo Inday sa syudad.
Suno kay Darwin Joemil Papa, Chief sang Disaster Response Division sang CDRRMO, apisar wala sang direkta nga epekto ang Bagyo Inday sa syudad, ginpaidalum sa gihapon sa blue alert status ang syudad.
Ini agud mapasiguro nga preparado nga naka-standby ang tanan nga response clusters sa pagresponde sa ano man nga halit nga dala sang bagyo.
Ini bangud nga posible nga mapabaskog sang bagyo ang hangin Habagat nga magadala sang “moderate to heavy” nga pag-ulan.
Pahayag pa niya, bilang kabahin man sa ila nangin preparasyon, ginapanugyanan na nga daan ang tanan nga barangay nga magconduct sang Pre-Disaster Risk Assessment (PEDRA) sa ila tagsa ka nasakupan agud nga mapahagan-hagan ang epekto sang bagyo sa syudad.
Ginpahayag man ni Chief Papa nga antes pa man magtupa ang bagyo, ginhatagan man sang direktiba ang mga kabarangayan sa syudad nga mag-amat-amat sa pagpanglimypo ilabi na sa pag-utod sang mga kahoy sa ila lugar nga posible mangin obstruction sa dalanon bangud sa mabaskog nga hampak sang hangin.
Dugang man sini, wala nila ginrekomendar ang preemptive evacuation apang ginapahanumdom ang publiko ilabi na sa mga hazards area nga magpabilin nga aligmat kag preparado.
Ginalantaw man ang mga posible nga pagbaha sa distrito sang Jaro, La Paz kag Arevalo.
Mabatyagan ang mga pag-ulan dala sang bagyo umpisa subong nga adlaw sang Huwebes tubtob sa adlaw sang Dominggo.
