Ginklaro sang National Historical Commission of the Philippines (NHCP) nga wala sang basehan ang pahayag sang pila ka Chinese scholars nga nagaangkon nga sakop sang China ang Batanes.
Suno sa NHCP, wala sang ebidensya sa kasaysayan ukon sa siyensya nga nagapamatuod sang ila pag-angkon sa nasambit nga lugar.
Ginpahayag man sang komisyon nga ang mga pagtuon sa Geology and Oceanography nagapakita nga ang Batanes kabahin sang continental shelf sang Pilipinas.
Gindugang pa sang NHCP nga wala sang rekord nga nagapakita nga ang China ang nagadumala sa Batanes.
Lakip diri ang ginsinulat sang British explorer nga si William Dampier sang 1687 kun sa diin nagapamatuod nga wala sang trace sang Chinese governance sa amo nga probinsya.
Ginpabutyag man sang komisyon nga pormal nga nangin kabahin sang probinsya sang Cagayan ang Batanes sang 1783 sa panahon sang mga Espanyol kag ginakilala ini nga kabahin sang teritoryo sang Pilipinas halin pa sang Una nga Republika.
Nagapanawagan naman ang NHCP sa mga academic institutions nga magpabilin nga mangin matutom sa kamatuoran kag mangin responsable nga researchers bangud ara sa kasaysayan nga ang Batanes kabahin sang teritoryo sang Pilipinas.
