Ginpabaskog pa sang Sandiganbayan 2nd Division ang desisyon sini nga indi pagtugutan ang hingyo ni Senador Jinggoy Estrada nga ipabasura ang kaso sini nga graft.
Ini may kaangtanan sa gina-alegar nga iregularidad sa ₱855 milyon nga flood control projects sa Bulacan kun sa diin ginapahayag nakabaton si Estrada sang 25% nga kickback halin mismo sa nasambit nga proyekto.
Sa resolusyon nga ginpaguwa kahapon nga adlaw, Hulyo 9, ginpahayag sang anti-graft court nga kulang kag wala sang nagakaigo nga basehan ang motion for reconsideration sang senador.
Ginpahayag man sang korte nga wala nalapas ang due process sa kaso ni Estrada bangud nakapasa ini sang counter-affidavit sa preliminary investigation.
Dugang pa diri, ginpahayag sang korte nga wala man gintugutan sang Office of the Ombudsman nga makapasa sang motion for reconsideration ini bangud sa wala sang nagakaigo nga rason agud ipabasura ang kaso batok sa Senador.
Sa matandaan nga magluwas sa kaso nga graft, nagapangatubang man si Estrada sang separado nga kaso nga plunder may kaangtanan sa ginaalegar nga ₱573 milyon nga kickback.
Una na nga nagpaguwa ang Sandiganbayan sang mando nga 90 ka adlaw nga suspensyon sini bilang senador.
Nahibaluan nga wala man gintugutan sang Sandiganbayan Fifth Division ang pangabay sang Senador nga makapartisipar sa impeachment trial ni Vice President Sara Duterte.
