Padayon nga naga-aligmat ang mga pumuluyo sa coastal areas sa Iloilo City subong nga mamadlos pa gihapon ang hangin nga dala sang Habagat nga ginapabaskog sang Bagyo Inday.
Sa interview sang Bombo Radyo kay Marlene Opelario, pumuluyo sang Barangay Sto. Niño Sur, Arevalo, iya ginpahayag nga ginakulbaan man siya kun malain ang tyempo apang ginapanilagan pa nila kun kinahanglan nga magsaylo.
Pananglitan suno sa iya nga kinahanglan gid mag-evacuate, nakahanda naman sila nga magsaylo anay sa balay sang iya amay.
Nangbutang man sila sang kawayan bilang panagang sa mga kahoy nga nagaguba sa haligi sang ila balay.
Umpisa sang pagmadlos sang hangin, nagkalakakas naman ang dingding sang balay sang iya bata apang gintabunan lang anay sang trapal agud nga indi makasulod ang hangin.
Nahibaluan nga gina-forecast nga magatupa gihapon ang pag-ulan subong sa madamo nga parte sang pungsod bangud sang Habagat kag mangin mabalod man ang kadagatan.
Base sa alas singko sa kaagahon nga weather advisory sang Philippine Atmospheric, Geophysical and Astronomical Services Administration (PAGASA) subong nga adlaw, Hulyo 11, napasaka sa Red Warning ang Barotac Nuevo, Dumangas, Iloilo City, Leganes, Mina, New Lucena, Oton, Pavia, Pototan, San Miguel, Santa Barbara, Tigbauan kag sa Zarraga.
Sa idalom sini nga status, ginpaandaman ang mga pumuluyo sa nasambit nga mga lugar sang posible matabo nga seryoso nga pagbaha.
Sa pihak nga bahin, ginpasaka naman sa Orange Warning ang Capiz, Aklan, Negros Occidental, Guimaras, Antique kag ang pila pa ka mga banwa sa Iloilo nga amo ang Ajuy, Alimodian, Anilao, Badiangan, Balasan, Banate, Barotac Viejo, Batad, Bingawan, Cabatuan, Calinog, Carles, Concepcion, Dingle, Dueñas, Estancia, Guimbal, Igbaras, Janiuay, Lambunao, Lemery, Leon, Maasin, Miagao, City of Passi, San Dionisio, San Enrique, San Joaquin, San Rafael, Sara, kag Tubungan.
Sa idalom naman sini nga status, posible suno sa weather bureau ang pagbaha sa manubo nga mga lugar kag pagtiphag sang duta sa mataas nga mga lugar.
Padayon naman nga nagapahanumdom ang awtoridad sa mga residente malapit sa baybayon amo man sa high-risk barangays nga magpreparar kag i-antisipar ang malain nga tyempo amo man ang mga risgo kaangay sang pagbaha.#
