Igapasaka sa Alert Level 3 ang status sang Bulkan Kanlaon kun padayon ang paglupok sini sa masunod nga mga inadlaw, suno sa Philippine Institute of Volcanology and Seismology (PHIVOLCS).
Sa subong, nagapabilin ang status sini sa Bulkan Kanlaon sa Alert Level 2 kasunod sang isa ka mabaskog nga paglupok sang Miyerkules sang aga.
Naglawig ini sang tatlo ka minuto kag nagbuga sang maitom nga abo nga nagsaka sang duha tubtob tatlo ka kilometro halin sa baba sang bulkan.
Suno sa PHIVOLCS, padayon nila nga ginabantayan ang aktibidad sang bulkan bangud narekord man ang mga paglinog sa idalom sini.
Nagpaandam naman ang ahensya sa mga residente nga maghalong gid kag gilayon nga mag-evacuate kon padayon ang mga paglupok sang nasambit nga bulkan.
