Wala sang may na-record nga evacuees sa tatlo ka mga barangay sa syudad sang Iloilo nga ginbaha bangud sa epekto sang Bagyo Inday kag Habagat ukon Southwest Monsoon.
Sa interview sang Bombo Radyo Sharry Ledesma, LDRRMO III sang Iloilo City Disaster Risk Reduction and Management Office, iya ginpahayag nga wala sang pamilya nga nag-evacuate halin sa barangay Zamora-Melliza, Brgy. Nabitasan, La Paz, kag Barangay Inday sa City Proper.
Bangud wala sang may nag-evacuate, wala man sang relief operation nga ginpatigayon sang mga otoridad.
Suno kay Ledesma, naka-alerto kag naka-preposition na ang Management Council kag ang mga kinahanglanon nga relief goods agud handa sa tion nga kinahanglanon ini.
Nagpahanumdom man ang Iloilo City Disaster Risk Reduction and Management Office sa publiko nga padayon nga bantayan ang mga weather bulletin sang PAGASA.
Nahibaluan nga nagrekomendar man sang pre-emptive evacuation ang Iloilo City Emergency Operations Center sa mga pumuluyo nga nagapuyo malapit sa higad sang suba, kag sa higad sang baybay.
Ini agud nga maluwas ang mga pumuluyo sa dala nga peligro sang baha kag storm surge sa mga delikado nga lugar.
Gin-abisuhan man ang mga residente sa sini nga mga high-risk areas nga magkadto gilayon sa ila designated evacuation centers ukon sa iban pa nga safe nga lugar kun kinahanglan.
Nagpanugyan man ang City Government nga magbitbit sang GO BAG, mga bulong, importante nga dokumento, flashlight, tubig nga mainom, pagkaon, kag iban pa nga emergency supplies, pati na ang payong ukon nagakaigo nga rain gear.
Nagpahanumdom man ini sa pumuluyo sang syudad nga magpabilin nga alerto, magpadayon sa pag-monitor sang mga official weather advisory, kag sundon gid ang mga abiso sang tagsa ka mga barangay officials kag emergency responders sa tanan nga oras.
