Nagbilin sang isa ka patay kag daku nga halit kaangay sang landslide, baha, kag pagkaguba sang mga taytay kag dalan ang makusog nga hangin kag mabaskog nga pag-ulan sa Western Visayas dala sang southwest monsoon ukon habagat nga ginpabaskog sang Bagyo Inday.
Sandig sa pinakaulihi nga record sang Department of Social Welfare and Development (DSWD) Field Office 6, masobra sa 29,000 ka mga tawo halin sa 35 local government units sa rehiyon ang naapektuhan bangud sa malain nga tyempo sa bilog nga weekend.
Sa sini nga numero, masobra sa 500 ka pamilya ang nagtinir sa 50 evacuation centers.
Lapaw man sa 400 ka mga balay ang naguba sa Aklan, Antique, kag Iloilo kun sa diin 29 ang nagkalawasak samtang 405 ang may porsyon lang nga naguba.
Sa separado nga report sang Iloilo Provincial Disaster Risk Reduction and Management Office-Operations Center, nakasaad nga 12 ka mga banwa sa probinsya ang apektado kun sa diin kadam-an sa na-eksperyensyahan amo ang pagbaha, pagtiphag sang duta, pagkatumba sang mga kahoy, kag pagkautod sang suplay sang kuryente.
Ang ginbilin naman nga casualty sang enhanced southwest monsoon sa Western Visayas amo si Placido Tabalina, 67-anyos, isa ka mangunguma, nga nagakatulog sa ila balay sa Barangay Nagba, Tubungan, Iloilo sang nagluntad ang landslide.
Sa interview sang Bombo Radyo kay Vice Mayor Leo Cezar Taypen, iya ginpahayag nga nahamtang malapit sa banglid ang balay sang biktima.
Pahayag sang bise-alkalde, halin sang ala-una tubtub alas tres sa kaagahon kahapon, tuman ka baskog ang ulan sa Tubungan rason sang landslide nga nagbilin sang casualty apisar sang temprano nga preparasyon sang banwa.
Pahayag sang bise-alkalde, halin sang ala-una tubtub alas tres sa kaagahon, tuman ka baskog ang ulan sa Tubungan.
Magluwas sa Barangay Nagba, apektado man ang mga Barangay Borong, Igtambog Sur, Cadabdab, Bato, Morcillas, kag Daga-ay.
Dugang sang vice mayor, sa Barangay Cadabdab kag Barangay Bato, wala pa sang taytay nga mahimo maagyan sang heavy equipment gani nga nagmano-mano kahapon ang barangay officials kag ang mga pumuluyo sa lugar.
Nahibaluan nga antes pa man ang paglaslas sang Bagyo Inday nga amo ang nagpabaskog sang Habagat nga nag-apekto sa rehiyon, ginpasaka na sang Regional Disaster Risk Reduction and Management Council 6 sa Blue Alert Status ang Western Visayas. May gin-preposition nga family food packs, relief items, kag standby fund nga P3 million para sa bilog nga rehiyon.#
