Lunsay powerhouse teams —England, Argentina, Spain, kag France — ang nabilin sa FIFA World Cup 2026 nga magasambuwa sa semifinals subong nga semana.
3:00 sa kaagahon sa Myerkules, oras sa Pilipinas, magaatubangay ang 2018 champions kag 2022 runner up nga France batok sa 2010 World Cup winner kag reigning European champions nga Espanya.
3:00 sa kaagahon naman sa Huwebes, oras diri sa Pilipinas, magasambuwa naman ang defending champions nga Argentina kag ang England.
Ini ang una nga tion nga makaatubang sang 39-anyos nga football superstar kag Argentina captain nga si Lionel Messi ang England, kag ini man ang una nga tion nga magatabuay ang banas sang duha ka teams matapos ang hampang sa 2022 World Cup sa Japan.
Sang amo nga tion, daog ang England paagi sa former captain nga si David Beckham nga amo ang naka-score sang winning penalty.
Si Beckham amo na subong ang president kag co-owner sang Major League Soccer (MLS) club nga Inter Miami nga amo ang team kun sa diin nagahampang si Messi.
Naka-sulod ang England sa semifinals matapos ginlutos sa extra time, 2-1, ang Norway kun sa diin nagahampang ang superstar nga si Erling Haaland.
Ang Argentina naman ang katapusan nga nag-qualify matapos nga nagtakop man sa extra-time ang hampang batok sa Switzerland, 3-1, kun sa diin ang naka-goal para sa reigning champions amo sanday Alexis Mac Allister, Julian Alvarez, kag Lautaro Martinez.
Ini ang una nga tion subong nga tournament nga wala naka-goal si Messi, apang siya ang nag-assist sa goal ni Alexis Mac Allister nga amo ang ila imbukada nga goal kahapon.#
