Siling nila, bisan sin-o man nga tawo pwede mangin baganihan subong nga panahon.
Ini ang ginpamatud-an sang pila ka mga indibidwal nga nagbulig sa biktima sang isa ka aksidente sa motorsiklo sa Circumferential Road, Lanit, Jaro, Iloilo City.
Ang biktima isa ka babaye nga suno sa mga nakakita, duguon ini samtang nagahapa sa tubig sa higad sang dalan.
Isa sa mga nagbulig amo SFO2 Sussie May Patricio Limaco Magan sang BFP-Roxas City.
Sa interview sang Bombo Radyo kay Limaco Magan, iya ginpahayag nga nagabyahe siya pabalik sa Roxas City sang may nabatian nga nagasinggit kag nagapangayo sang bulig nga tatlo ka mga indibidwal.
Gilayon ini nga nanaog sa iya salakyan kag gin-assess ang sitwasyon sang biktima.
Nagtawag man ini sang BFP ambulance kag gin-check ang biktima tubtob nga nakaabot ang mga responders halin sa banwa sang Leganes.
Natigayon naman nga madala sa ospital ang biktima.
Ginsiling naman ni Limaco Magan nga bisan naandan sang publiko nga ang mga bombero para lang sa pagpatay sang kalayo, sila ang nahanas man agud maghatag sang Basic Life Support (BLS), standard first aid, kag emergency medical response kun kinahanglan, nagasuksok man sila sang uniporme ukon wala.
