Gindakop sang otoridad ang isa ka school principal nga suspek sa pagpatay sa isa ka manunudlo nga nagabusong.
Natabo ang pag-aresto sang mga operatiba sang Abra Provincial Police Office sa Lagangilang, Abra sa gahum sang warrant of arrest.
Ang biktima amo si Maria Elaine B. Valencia, 36-anyos, iloy sang 16-anyos nga estudyante nga ginapahayag karelasyon sang suspek.
Kaso nga murder ang ginapangatubang sang principal bangud sa pagpatay sa biktima sang Mayo 9, sa ambush sa amo nga probinsya.
Sang natabo ang krimen, nagabusong sang pito ka bulan ang biktima.
Nagaangkas ini sa iya bana sa motorsiklo sang ginpaulanan sang bala sang suspek.
Nag-angkon ini sang mga igo sang bala sa lawas nga gintunaan sang iya kamatayon.
Wala naman napilasan ang iya bana.
Ginpahayag nga ang pagpamatok sang biktima sa relasyon sang iya anak kag sang suspek ang motibo sa krimen.
