Nakigkita kag nagkighinun-anon si President Ferdinand “Bongbong” Marcos Jr. kay Prime Minister Lawrence Wong sang Singapore kahapon nga adlaw, Hulyo 15.
Ini agud pabaskugon dugang ang mga pamaagi sa pagpalig-on sang bilateral relation sa tunga sang Pilipinas kag Singapore.
Ginpasiguro sang mga ini ang malawig kag mabakod nga pagbinuligay sa ila pagpakigkita sa Istana, nga amo ang opisyal nga opisina sang Prime Minister sang Singapore.
Suno sa Presidential Communications Office, gin-istoryahan sang duha ka lider ang pagpalapad pa sang trading, paggamit sang mga oportunidad sa artificial intelligence ukon AI, pag-engganyo sang dugang nga mga investors, kag pagpalig-on sang kooperasyon sa sektor sang ikaayong lawas kag amo man ang pagpa-uswag sa sosyodad.
Nagsugtanay man ang duha ka pungsod nga padayonon ang pagpatuman sang bag-o nga bilateral nga mga kasugtanan nga magahatag sang mas daku nga benepisyo sa Pilipinas kag Singapore.
Dugang pa sang PCO, ginpabutyag sang Pilipinas kag Singapore ang ila pareho nga pangako nga mapabilin nga malinong, mapag-on kag mainuswagon ang ASEAN, agud makahatag sang mas madamo nga mga oportunidad para sa ila mga pumuluyo.
Sa pihak nga bahin, yara si President Marcos sa Singapore para sa isa ka working visit halin Hulyo 14 tubtob Hulyo 16.
Natalana man siya nga makigkita sa mga business leaders kag investors sa Milken Institute Private Roundtable Discussion.
Samtang, natalana man nga maghatag sang mensahe si First Lady Liza Araneta-Marcos sa Global Economic Cooperation East Summit.
