Ginkahangaw-an sang mga commuter ang gision nga ruweda sang isa ka modernize jeepney samtang nagabyahe ini sa syudad sang Iloilo.
Sa interview sang Bombo Radyo kay Atty. Ma. Jocet Buyco Abellar, Chief Transportation Development Officer sang Land Transportation Franchising and Regulatory Board (LTFRB) Region VI, iya ginpahayag nga ginamonitor na sang ila opisina ang nasambit nga modernized jeep amo man ang iban pa nga public utility vehicles nga nagabyahe sa syudad.
Suno pa kay Abellar sa pag-inspeksyon sa mga modernized jeep, ginalantaw anay ang mga markings sini, amo man ang suga kag iban pa nga kinahanglan inspeksyunon sang LTFRB antes makahatag sang kumpirmasyon sa transport cooperative ukon operator.
Dugang pa sini, nagapatigayon man ang LTFRB sang roadside inspection agud masiguro nga nagasunod ang mga public utility vehicles sa safety standards.
Pahayag pa ni Abellar, kun mapamatud-an nga may ara sang paglapas ang amo nga operator mahimo sila mag-isyu sang show cause order ukon magpatuman sang iban pa nga nagakaigo nga tikang para maprotektahan ang kaluwasan sang publiko.
