Depektibo ang primary kag secondary clutch master assembly sang firetruck sang Estancia Fire Station nga gingamit sa pagresponde sa sunog sa Estancia Feeder Port sang Hulyo 13.
Sa interview sang Bombo Radyo Iloilo kay Fire Chief Inspector Reynan Gecana, Acting Chief sang Operations Division sang Bureau of Fire Protection Regional Office 6, iya ginpahayag nga naka-engage ang power take-off ukon PTO system sang firetruck.
Ini ang rason kun ngaa wala na-transfer ang engine power padulong sa fire pump kag wala nagapagwa sang tubig ang hose samtang ginapalong ang sunog.
Pahayag pa ni Gecana, base man sa ila incident report, nakabaton sang tawag ang Estancia Fire Station pasado ala una sa hapon kag nagresponde ang Fire Engine 1 pag-abot ala 1:31 sang hapon sa lugar sang insidente antes nagluntad ang mechanical failure.
Gilayon naman nga ginpadala ang Fire Engine 2 para magbulig sa pagresponde sang sunog.
Sa inisyal nga assessment, nakit-an nga may gisi ang clutch master components nga posible nga gintunaan sang depekto.
Nahibaluan nga ang apektado nga firetruck amo ang unit nga gin-donar sang Japan International Cooperation Agency (JICA) sa Estancia Fire Station sang 2014 kasunod sang Typhoon Yolanda.
Sa karon, padayon ang imbestigasyon sang BFP-6, apang wala pa sang may ginpaguwa nga final investigation report samtang nagahulat sang otorisasyon sang Regional Director.
