Ginpasakaan sang kaso sang Amlig Antique Alliance sanday Uswag Partylist Representative Jojo Ang amo man si anay Ako Bicol Rep. Zaldy Co, kag Alfonso Tan sa Office of the Ombudsman Visayas.
Dala ang lima tanan ka mga maleta, ginpasakaan sang koalisyon ang mga nasambit nga indibidwal bangud sa ginapahayag irregularidad sa mga construction project sa Antique.
Sa interview sang Bombo Radyo sa Chairman sang Amlig Antique Alliance, iya ginpahayag nga nagalaom ang ila grupo nga mapasabat ang mga mataas nga opisyal sang gobyerno kag mga corporate executives, nga gina-alegar may violations sa environmental laws, procurement regulations, anti graft, and land use laws nga may koneksyon sa DPWH infrastructure project halin sang tuig 2019 tubtob 2025.
Nahibaluan nga ang mga maleta may mga label nga 145 million pesos, 192 million pesos, 148 million pesos, 95.5 million pesos, kag 93 million.
Ini nga mga label ang nagarepresentar sang balor sang project nga nalakip sa mga papeles nga unod sang nasambit nga mga maleta.
Pahayag pa sang grupo nga gintinguhaan nila nga mangayo sang bulig sa nagkalain-lain nga sektor sang gobyerno apang wala sila sang nakit- an nga paghulag.
Amo ini ang nag tulod sa ila sa pag-file sang kaso.
Gindugang man sini nga umpisa palang ini kag madamo pa sila sang kaso nga ipasaka may kaangtanan sa nasambit nga iregularidad.
