Nagdepensa ang Iloilo City Police Station 10 nga natabuan lamang nga malayo ang presensya sang kapulisan sa lugar kon sa diin ginapahayag nga ginhold-up kag gin-snatch ang isa ka call center agent sa Barangay Bolilao, Mandurriao, Iloilo City sang nagligad nga Hulyo 14.
Sa interview sang Bombo Radyo kay Police Captain Lester Oliveros, Officer-in-Charge sang Police Station 10, iya ginpahayag nga matapos ang nagluntad nga insidente, nagdiretso ang biktima sa Police Station 5 agud magpangayo sang bulig.
Nahibaluan nga gin-withdraw sang biktima ang kwarta nga P90,000 nga ginpadala sang iya iloy nga yara sa sagwa sang pungsod.
Pahayag pa ni Oliveros, nagabantay ang biktima sang depampasahero nga jeep sa kilid sang Injap Tower agud magpauli sa banwa sang Leganes sang hinali lang may tatlo ka indibidwal nga nagpalapit sa iya.
Gintuad man sang biktima nga gintayaan siya sang isa sa mga suspek sang kutsilyo rason nga nakuha gid sang mga ini ang iya nga gina-sukbit nga bag kun sa diin nakasulod ang nasambit nga kantidad sang kwarta.
Sa subong, padayon ang imbestigasyon sang kapulisan agud madakpan ang mga suspek nga yara sa likod sang krimen.
Nagpahanumdom naman si Oliveros sa publiko, ilabi na ang mga nagadala sang daku nga kantidad sang kuwarta, nga maghalong gid sa ila palibot bangud may yara sang mga kriminal nga nagabantay sang ila mahimo nga mabiktima.
Gindugang pa sini nga maayo gid nga may ara sang upod ukon indi na magsakay sa pampubliko nga transportasyon agud malikawan ang kaangay nga insidente.
