Ginkondenar sang pila ka senador ang ka AI-generated video nga ginpagwa sang isa ka media outlet nga nakabase sa China, nga nagapakita sa mga Pilipino bilang mga amo may kaangtanan sa isyu sang 2016 Arbitral Award sa West Philippine Sea (WPS).
Suno kay Senate President Sherwin Gatchalian, wala sang lugar ang racism kag pagguba sa dignidad sang isa ka tawo, bisan pa may mga wala sang pag-intindihanay sa tunga sang mga pungsod.
Ginpanawagan man niya sa tanan nga media kag mga institusyon ang mangin responsable, matarong, kag may respeto nga pagpahayag sang mga impormasyon.
Samtang, ginpahayag ni Senator Francis “Kiko” Pangilinan nga klaro nga racist kag makainsulto ang nasambit nga video.
Nagpanawagan man ini sa gobyerno sang China nga ipa-delete ang video, magpaathag kag magpangayo sang public apology, kag pasabton ang mga responsable sa paghimo kag pagpagwa sini.
Samtang, ginpahayag ni Senate Majority Leader Migz Zubiri nga indi dapat magresulta sa rasismoang wala paghangpanay nahanungod sa isyu sang West Philippine Sea.
Suno sa iya, padayon nga ipanindugan sang Pilipinas ang iya mga kinamatarong paagi sa layi, kamatuoran, kag diplomasya.
