Nagapati ang broadcast technician sang Bombo Radyo Iloilo nga masobra sa tatlo ka suspek ang nagpangawat sa transmitter site sang Bombo Radyo Iloilo nga nahamtang sa Brgy. Loboc, Lapuz, Iloilo City kahapon sang kaagahon, Hulyo 20.
Ini matapos nga nadula ang mga equipment\items nga kinahanglanon agud maka-broadcast ang estasyon sang Bombo Radyo Iloilo.
Sa interview sang Bombo Radyo kay Bombo Nelson Baron, iya ginpahayag nga pagsign-on pa lang nila naga-drop out na ang Standing Wave Ratio (SWR) kag tuman kahina na ang power kun sa diin kaangay nga isa lamang ka kilometro ang malab-utan sang broadcast sini.
Gin-tinguhaan pa sini nga i-adjust kag lantawon ang mga dapat kay-uhon agud nga maka-on-air na, apang wala gid ini makay-o.
Pahayag pa ni Baron, nagpadulong ini sa ginatawag ”dog house” agud nga lantawon ang mga wire apang nakibot na lang ini nga wala na ang tank oil nga isa sa pinaka-importante nga equipment agud nga maka-broadcast ang estasyon.
Dugang pa ni Baron nga ginabulubanta alas-12 tubtob alas-2 sa kaagahon ini nga ginkawat bangud natapos ang pag-broadcast sang estasyon mga 9: 40 sa gab-i kag nagasugod naman ini sa pagset-up mga 3:40 sa aga.
Suno pa kay Baron, posible nga indi magnubo sa tatlo ka tawo ang nagkuha sang amo nga mga equipment bangud magluwas nga mabudlay ang ginahamtangan sini madalom man ang tubig sang punungan.
Sa karon, ginapatigayon na ang madasig nga pagbakal sang mga nakawat nga equipment sa Manila kag ginaasikaso na nga mapadala diri sa Iloilo sa madali nga panahon.
Ginapatigayon man subong ang imbestigasyon para maaresto ang sin-o man nga naghimo sang amo nga malain nga buluhaton.
Nagapangabay naman ang estasyon sang Bombo Radyo Iloilo sa kooperasyon sang publiko nga makig-angot sa otoridad kun may namutikan kamo nga mga indibidwal nga responsable sa sini nga krimen kag magabaligya sang nasambitan nga mga items.
Ginapaandaman man ang sin-o nga makabakal kag magtago sang amo nga mga kagamitan nga may yara man kamo sang salabton kun ini ang inyo baklon ukon taguon sa idalum sang laye nga Presidential Decree No. 1612 (Anti-Fencing Law).
Ang krimen ang may silot nga pagkapriso kag penalidad nga katumbas sang balor sang mga kinawat nga kagamitan.
Daw parehas nga kamo man mismo ang nangawat.
Sa sin-o man nga makabulig agud madakup kag mapasakaan sang nagakaigo nga kaso kag mapriso ang tawo ukon mga tawo nga responsable sa pagkawat sang nasambit nga mga items/equipment, may pagabatunon nga 𝗣𝟯𝟬𝟬,𝟬𝟬𝟬.𝟬𝟬 nga padya.
Lauman nga mangin strictly confidential ang impormasyon sang mga tawo nga nakig-angut.
Sa subong, samtang wala pa nakabalik sa normal ang amon operasyon, ang mga programa sang Bombo Radyo Iloilo ang mabatian ninyo sa 99.5 Star FM Iloilo.
Ginatinguhaan gid sang management nga makabalik gilayon sa kahanginan sa madali nga panahon agud padayun nga maka serbisyo sa inyo.
Padayun man sa pagbantay sang mga balita sa Bombo Radyo pinaagi sa Youtube channel kag Website sang Bombo Radyo Iloilo kag Bombo Radyo Philippines.
Madamo gid nga salamat. BASTA RADYO…BOMBO!!!
