Nag-umpisa na subong nga adlaw ang pag-release sang ₱2,000 nga ayuda sa idalom sang Unified Package for Livelihoods, Industry, Food, and Transport (UPLIFT) Assistance Program sa nagkalain-lain nga barangay sa distrito sang La Paz.
Base sa pagpangusisa sang Bombo Radyo Iloilo, alas-7 sang aga pa lang nagtipon na ang pila ka aplikante sa mga barangay hall, apang alas-9 pa sang aga opisyal nga nagsugod ang releasing sang ayuda.
Ginhatagan prayoridad ang mga senior citizen kag indigent residents gikan sa mga barangay sang La Paz Proper, Sinikway, Lapuz, Alalasan, Lapuz kag Barrio Obrero.
Sa interview sang Bombo Radyo kay Jing Espinosa, 73-anyos kag residente sang Sinikway, Lapuz, iya ginpahayag nga kulang ang P2,000 nga bulig para sa iya pang-adlaw-adlaw nga kinahanglanon.
Apang dako naman ang iya pagpasalamat sa sini nga ayuda sang gobyerno nga apisar magamay lang apang makabuilig sa gihapon sa iya, ilabi na sa pagbakal sang iya bulong.
Pareho man ang nangin pahayag ni Rodelita Desucatan, 79-anyos sang Don Esteban, Lapuz, nga nagsiling nga indi makaigo ang nasambit nga kantidad sang ayuda para sa ila madamo nga kinahanglan sa sulod sang balay.
Suno pa sa iya nga ang amo nga kantidad, duwa lamang kaadlaw nga magamit sang benepisyaryo.
Sa pihak nga bahin suno man sa mga aplikante, kinahanglan anay makakuha sang Certificate of Indigency kag Certificate of Residency sa barangay antes makaproseso sang aplikasyon.
Kinahanglan man nga ipasa ang form, barangay certificate nga may pirma sang kapitan kag photocopy sang valid ID.
Nahibaluan nga ang UPLIFT Assistance Program ginpatigayon sang national government kun sa diin nagahatag sang one-time nga ₱2,000 nga cash assistance sa kwalipikado nga mga benepisyaryo bilang bulig batok sa pagsaka sang presyo sang mga panguna nga balaklon kag gatong.
Ginalauman nga makabenepisyo sini ang kapin 7.5 milyon ka panimalay sa bug-os nga pungsod.
By: Bombo Cyrene Nasis
