Gilayon nga nagkoordinar si Lapuz District ABC President Arnel Asturias sa mga punong barangay sa nasambit nga distrito kasunod sang natabo nga pagpangawat sa transmitter site sang Bombo Radyo Iloilo nga nahamtang sa Barangay Loboc, Lapuz, Iloilo City.
Ini matapos nga nadula ang mga gamit sa transmitter kaangay sang:
*4 PIECES TANK COIL
*2 PIECES 565 KVA
*4 PIECES COPPER STRAP (6 INCHES IN WIDTH, 10FT IN LENGTH)
*3 METERS GROUNDING ROD
*120 PIECES COPPER GROUNDING RADIALS (260FT)
Sa interview sang Bombo Radyo kay Asturias, iya ginpahayag nga gilayon siya naghatag sang direktiba sa mga punong barangay sa nasambit nga distrito agud nga magpatuman man sang imbestigasyon kag i-monitor ang mga junk shop sa ila distrito, bangud ginapatihan nga posible igabaligya sang mga suspek ang mga kinawat nga kagamitan agud makakwarta.
Suno kay Asturias, posible nga sa likod nga bahin sang lugar nag-agi ang mga suspek antes ginpangkuha ang mga equipment sa transmitter site.
Sa pihak nga bahin, gilayon man nga nagpatigayon sang imbestigasyon ang Lapuz Police Station agud matumod ang mga responsable sa krimen.
Dugang pa ni Asturias, naghatag man siya sang mando nga i-koordinar ang impormasyon sa tanan nga police stations sa syudad agud masekyar ang mga junk shop kag mapadasig nga matumod ang sa likod sang pagpangawat sa transmitter site sang Bombo Radyo Iloilo.
Nagapadayon man sa subong ang imbestigasyon sang kapulisan angut sa nasambit nga insidente.
