Ginpresentar sang defense team ang isa ka Social Weather Stations (SWS) trust survey ni Vice President Sara Duterte sa nagapadayon nga impeachment trial agud pamangkuton kun may epekto bala ang pagtan-aw sang publiko sa imbestigasyon sang National Bureau of Investigation (NBI).
Sa cross-examination kay NBI Director Melvin Matibag, ginpakita ni defense counsel Mark Vinluan ang isa ka social media post nga nagapahayag nga may 57 porsyento nga trust rating si Duterte samtang may 34 porsyento nga rating si Presidente Ferdinand Marcos Jr.
Ginpamangkot ni Vinluan kun mahimo pa nga ikabig nga may “betrayal of public trust” ang Bise Presidente bisan mas mataas ang iya trust rating.
Suno sa iya, ginpresentar ang survey bilang “controverting evidence” nga may kaangtanan sa alegasyon sang betrayal of public trust. Apang nag-object ang prosecution panel kag nagpahayag nga wala sang kaangtanan ang survey sa impeachment trial.
Sa iya sabat, ginpahayag ni Matibag nga ang mga survey isa lamang ka “snapshot” sang sentimyento sang publiko kag wala ini ginabasehan sang NBI sa ila imbestigasyon. Ginpabutyag niya nga ang ila mga imbestigasyon nagasunod sa layi, due process kag mandato sang ahensya.
Sang ginpamangkot kun may epekto ang survey sa imbestigasyon, direkta nga nagsabat si Matibag sang, “No, it will not.”
“A survey is just a snapshot of what is happening. It doesn’t necessarily follow na kapag ‘yun ang lumabas, ‘yun na ang totoo,” suno kay Matibag.
Gindugang pa niya nga indi dapat pag-gamiton ang popularidad sang isa ka opisyal bilang depensa batok sa pagpanabat sa posible nga paglapas sa layi. Suno sa iya, kon popularidad ang mangin basehan, daw ginapasugtan nga ang isa ka popular nga opisyal mahimo makahimo sang krimen nga indi na pagpasabton.
“Pangalawa, kapag po ating pinagbasehan ang popularidad, ang ibig sabihin po ba nito ang isang pinakakilala at popular na tao pwede nang gumawa ng krimen at hindi natin papanagutin?” suno sa NBI Director.
Si Matibag ang katapusan nga testigo sang prosekusyon para sa article of impeachment nga may kaangtanan sa ginaalegar nga grave threats batok kay Presidente Marcos. Lakip man sa mga reklamo batok kay Vice President Duterte amo ang betrayal of public trust kag isyu sang wala mapaathag nga manggad.#
