Gindepensahan ni Batangas Rep. Gerville Luistro, ang mga witnesses sa impeachment trial batok kay Vice President Sara Duterte matapos magsiling si Senator-Judge Robin Padilla nga indi dapat mangin “one-sided” ang ila pagpresentar sa kaso.
Suno kay Luistro, trabaho sang prosekusyon nga ipakita kag pamatud-an ang kaso batok sa respondent, samtang ang depensa naman ang may katungdanan nga depensahan ang akusado.
Ginpahayag niya nga normal lang nga mangin determinado ang prosekusyon sa pagpresentar sang ebidensya batok sa respondent bangud amo ini ang ila papel sa isa ka trial.
Nagsugod ang ini nga diskusyon matapos ginkwestyon ni Padilla ang pagpresentar sang prosekusyon sang ila mga witness.
Gin-athag naman ni Luistro nga wala sang kaso nga perjury ang mga testigo nga ginmensyunar ni Padilla.
Matapos ang pagpamangkot ni Padilla kay Luistro, ginsaway man sini ang pila ka tawo sa atubangan nga bahin sang impeachment court matapos nga na-interrupt ini sang ila nga reaksyon mtapos ang pangabay sang Senator-judge sa Prosekusyon nga dapat indi mangin one sided ini.
Nagpahanumdom naman si Padilla nga kinahanglan sundon ang rules sa sulod sang korte.
Samtang, sa press conference naman nga ginpatigayon sang Prosecution team, nagpangayo sang pasaylo si private prosecutor Atty. Lorna Kapunan kay Padilla matapos sini akuon nga isa siya sa mga nag-react sa pahayag sang senator-judge.
Ginpaathag sini nga natural lamang ini nga reaksyon sang mga abogado nga aktibo nga nagapartisipar sa trial, kag wala sila sang tuyo nga mang-insulto ukon magpakita sang wala sang respeto sa sulod sang impeachment court.
