Nagpaguwa sang bag-o nga subpoena ang Senate Impeachment Court batok sa duha ka anay branch manager sang Land Bank of the Philippines nga mangin testigo sa masunod nga trial sang impeachment trial ni Vice President Sara Duterte sa Hulyo 29.
May kaangtanan ini sa Article I sang Articles of Impeachment nga nagatalakay sang ginatawag nga indi husto nga paggamit ni Duterte sang kabug-usan nga P612.5 milyon nga confidential funds, lakip ang P500 milyon halin sa Office of the Vice President kag P112.5 milyon halin sa Department of Education.
Suno kay House Lead Prosecutor Gerville Luistro, si Violet Constantino ang una nga ipatawag bilang testigo, kag sunod naman si Nenita Camposano.
Samtang nagpamangkot si Defense counsel Mark Vinluan kon sobra sa isa ka testigo ang magatambong sa masunod nga trial, nagpahayag si Senate President kag Impeachment Court Presiding Officer Francis Escudero nga pagahtagan sang subpoena ang duha ka testigo agud makahanda ang mga ini.
Sa matandaan nga sang Hulyo 21, ginbawi sang korte ang una nga subpoena para sa duha ka anay opisyal sang LandBank samtang nagapadayon ang cross-examination kay National Bureau of Investigation Director Melvin Matibag.
Magapadayon ang impeachment trial sa Hulyo 29, alas-10 sang aga, pagkatapos sang ikalima nga State of the Nation Address (SONA) ni President Ferdinand Marcos Jr. sa Hulyo 27 kag sang gintalana naman nga “Kontra-SONA” sang mga senador sang minorya sa masunod nga adlaw.
