Gin-anunsyo ni Mayor Raisa Treñas subong nga kaagahon nga suspendido ang face-to-face classes sa Pre-School tubtub sa Senior High School sa Iloilo City subong nga adlaw, Hulyo 24.
Ini ang kasunod sang mamunog nga pag-ulan nga nagdala sang pagbaha sa pila ka areas sa syudad.
Ginarekomendar sa mga eskwelahan suno sa alkalde nga mag-shift anay sa Alternative Delivery Mode.
“To protect students and safeguard commuters from localized flooding and heavy rains, face-to-face classes from preschool to senior high school are suspended today, Friday, July 24, 2026. Schools are recommended to shift to Alternative Delivery Mode. Stay safe, Ilonggos,” post ni Mayor Treñas.
Sa separado nga pahayag sang Iloilo City Government, ginpahayag man nga ipaidalom ang Emergency Operations Center sa Blue Alert Status epektibo 12:00 karon sa udto bangud sang posible nga epekto nga dala sang Bagyo Kiyapo kag enhanced Southwest Monsoon.
Katuyuan sang deklarasyon nga masiguro ang mas mataas nga lebel sang pagpanghanda, padayon nga pag-monitor, kag alerto nga koordinasyon sang tanan nga mga ahensya kag response clusters.
Ginmanduan ang tanan nga miyembro sang Iloilo City Disaster Risk Reduction and Management Council, lakip ang mga yara sa lebel sang mga distrito kag barangay, nga i-activate ang ila tagsa ka Emergency Operations Centers, ipatuman ang nagakaigo nga preparasyon, kag magsumite sang nagakaigo sa tion nga situational reports sa Emergency Operations Center.
Ginahingyo naman ang publiko nga magpabilin nga alerto, padayon nga bantayan ang opisyal nga weather advisories sang PAGASA kag ang mga update sang Emergency Operations Center, kag himuon ang nagakaigo nga pagpangaman agud mapahagan-hagan ang risgo nga dala sang mabaskog nga ulan kag posible nga pagbaha.
Sa ulihi nga update nagikan sa state weather bureau, nagbaskog ang Bagyo Kiyapo samtang nagahulag ini pa-nakatundan naaminhan nakatundan sa dagat nga yara sa nasidlangan sang Cagayan. Ulihi nakit-an ang sentro sang Tropical Depression Kiyapo sa kalayuon nga 555 km nasidlangan sang Tuguegarao City, Cagayan.
