Patay ang isa na naman ka Pinoy matapos nga gin-atake sa Black Sea ang isa ka gas tanker nga pakadto kuntani sa Ukraine.
Wala pa ginhatag ang kumpleto nga detalye sa identity sang biktima, apang santo sa reports sang Romanian media, isa ini ka Filipino national.
Base pa sa tiglawas sang Romanian health ministry, 46-anyos ang edad sang biktima kag nagsuprer sang sunog sa 10% sang iya lawas kag nasamad gid ang airways rason nga ginbawian sang kabuhi.
Suno sa mga report, kabahin ang biktima sa tatlo ka tripulante nga napilasan sang gin-igu sang atake ang Gas Lisbon nga isa ka Liberian-flagged tanker nga may karga nga kapin 3,790 tonelada sang propane samtang nagapadulong ini sa Ukrainian port sang Reni.
Ginapahayag nga natabo ang insidente sang Martes.
Wala pa sang opisyal nga kumpirmasyon kaangot sa nationality sang duha pa ka crew members nga napilasan.
Ginbasol sang Ukraine ang Russia sa natabo nga pag-atake kag gintawag ini nga isa ka deliberate act of “terror.”
Nagpahayag si Romanian President Nicusor Dan nga posible may kaangtanan ini sa nagapadayon nga inaway sang Russia kag Ukraine.
Sa sini nga tion, padayon pa ang imbestigasyon sang Romanian authorities agud mahibaluan kon sin-o ang responsable sa pag-atake kag kon ano nga klase sang armas ang gin-gamit.
Nahibaluan nga ang Black Sea amo ang isa sa mga lugar nga masami ginaluntaran sang komprontasyon sa tunga sang Ukraine kag Russia halin sang nagsugod ang malawig nga inaway ukon full-scale invasion sang Russia sa Ukraine sang 2022.
Una na nga ginkumpirma sang Department of Migrant subong nga semana nga may duha man ka Pinoy nga napatay, isa ang missing, kag 12 ang nasamaran sa Russian drone attacks sa commercial ships sa amo man nga dagat.
Ang amo nga serye sang atake ang nag-apekto na sa indi magnubo siyam ka mga barko kun sa diin may indi magnubo 139 ka mga Filipino crew members nga nakasakay.
