Hugot nga ginapatuman sang Police Regional Office 6 (PRO-6) ang ‘bloodless campaign’ batuk sa anti-illegal drugs operations.
Sa interview sang Bombo Radyo kay PRO-6 Acting Regional Director PBGEN Randulf Tuaño, may tion nga nagabato ang drug subject sa mga otoridad rason nga last resort ukon ulihi na nga tikang ang paggamit sang armas ukon ‘one shot’.
Pahayag ni PBGEN Tuaño, ginatinguhaan gid sang kapulisan nga madakop ang subject nga wala sang may madisgrasya apang kun indi madala sa negosasyon ukon pagpasungka kag padayon nga nagapalupok ini sang armas-luthang batuk sa mga operatiba, wala na sang iban nga mahimo ang kapulisan kundi magdepensa man sang ila kaugalingon.
Madumduman nga sang damlag lang napatay ang isa ka lalaki nga ginkilala kay alyas Namo, 46-anyos matapos nagbato ini kag natiruhan sang operatiba kadungan sang ginpatigayon nga drug buy-bust opersation sa Brgy. Bayo, Piqueño, Anini-y, Antique.
Ginpahayag ni PBGEN Tuaño nga base sa inisyal nga imbestigasyon, wala sang may ginlapas nga protocol kag nasunod sang kapulisan ang Standard Operation Procedure (SOP) sa nasambit nga insidente.
Dugang pa niya, ginapasiguro sang PRO 6 nga indi mabutang sa peligro ang kabuhi sang mga kapulisan sa ano man nga klase sang operasyon.
 ang 'bloodless campaign' batuk sa anti-illegal drugs operations.){kind=link}