Nagtupa sa presuhan ang isa ka 29-anyos nga lalaki matapos gin-alegar nga nagbaligya ini sa internet sang mga video sang iya pagpakighilawas sa mga menor de edad nga babaye.
Ang arestado amo si alyas Ed nga ginpasakaan sang kaso nga paglapas sa Anti-Online Sexual Abuse or Exploitation of Children kag Anti-Child Sexual Abuse or Exploitation of Materials.
Sa interview sang Bombo Radyo kay Police Colonel Richard Habawel, Chief sang Regional Anti-Cybercrime Unit-6 (RACU-6), iya ginpahayag nga gin-aresto si alias Ed sa isa ka boarding house sa suyudad sang Iloilo.
Ginpahayag nga nagsugod ang imbestigasyon matapos magreklamo ang isa ka menor de edad nga gin-alegar nabiktima sang suspek.
Sang gin-usisa sang pulis ang ebidensya kag may nakit-an nga probable cause, didto kag nag-apply para sa cyber warrant kag sang gindagdag na, gin-aresto ang suspek.
Nakit-an man sa cellphone sini ang dugang pa nga videos sang pagpakighilawas sa duha pa ka gid ka mga menor de edad nga ginalantaw nga posible dugang nga ebidensya.
Sa imbestigasyon, nagguwa nga nagakadto ang suspek sa mga balay-ilimnan agud mangita sang mga menor de edad nga babaye nga iya maengganyo nga magpakighilawas kabaylo sang kwarta.
Ginahagad sini ang mga biktima sa iya ginatiniran nga boarding house kag nagapangayo sang permiso nga makuhaan sang video ang ila pagpakighilawas.
Apang, suno sa mga otoridad wala nahibaluan sang mga menor de edad nga ang mga video gin-upload kag ginabaligya sang suspek sa isa ka online adult website.
Dugang pa ni Habawel, nagasaylo-saylo ang suspek sang boarding house kada duha ka bulan rason nga nangin madanlog ini sa mga otoridad antes madakpan.
Ginpabutyag man ni Habawel nga bisan pa may permiso pa sang mga biktima ang pagkuha sang video, iligal gihapon ini bangud mga menor de edad ang mga involved.#
