Ginhatagan importansya sang isa ka business consultant ang pag-angkon sang bastante nga ihibalo tuhoy sa Pax Silica bag-o maghimo sang opinyon ukon magdihon sang desisyon kun ini ang dapat suportahan ukon pamatukan.
Ang Pax Silica nga isa ka U.S.-led international initiative nga ginaduso nga tukuron sa Pilipinas ang nagatuyo nga makahimo sang hub para sa isa ka secure kag resilient supply chains para sa mga teknolohiya nga kritikal sa artificial intelligence (AI).
Ang lugar kun sa diin ini tukuron amo ang 4,000-acre nga site sa New Clark City sa Tarlac.
Sa interview sang Bombo Radyo kay Ken Lerona, iya ginpahayag nga importante nga takson ang pareho nga mga posible nga benepisyo kag kag peligro sang proyekto.
Suno sa iya, nagakadapat tun-an ang mga impormasyon gikan sa masaligan nga mga sources.
Ginpahayag niya nga mahimo magdala ang Pax Silica sang mga oportunidad pareho sang investments, pagbukas sang trabaho, kag pagsanyog sang teknolohiya.
Apang dapat man busision ang mga isyu may kaangtanan sa palibot, paggamit sang dunang manggad, kag ang long-term nga epekto sini sa pungsod.
