Nagtaliwan na ang Ilongga nga si Mary Rivera nga nakilala sa iya papel bilang Lola ni Ned ukon ni Jacob Batalon sa “Spider-Man: No Way Home.”
Base sa kumpirmasyon sang iya pamilya, nagtaliwan si Mary sa edad nga 82-anyos samtang yara sa Honolulu, Hawaii. Napatay siya sang Abril 15, 2026 apang subong lamang nasapubliko.
Ginpahayag nga nagsuprer ini sang stroke kag nagkinahanglan sang life support.
Ginbun-ag si Mary sang Hunyo 2, 1943 sa La Paz, Iloilo City, kag nakuha ang iya college degree halin sa University of San Agustin sang 1964.
Sa interview sang Bombo Radyo Iloilo sa iya sang Oktubre 2022 sa ila pagpauli sa Iloilo, nasugid sini ang iya mga inagyan antes ang iya Hollywood debut. Nakaserbe siya bilang school teacher, radio broadcaster kag church missionary, kag nagdugay sa pagpangabuhi sa Honolulu upod ang iya pamilya.
Tuman ini ka-proud sa iya nangin papel sa ginakabig highest grossing film sang 2021 bangud masobra 6,000 suno sa iya ang mga nag-audition sa nasambit nga role kag siya ang napilian apisar nga madamo sang mga artista nga nagpasimpalad.
Nangin bantog sa Marvel fans ang iya linya ilabi na nga Tagalog ini kag nadala gid ang kultura sang mga Pilipino sa screen kun sa diin nakaupod sini sanday Jacob Batalon, Zendaya, Tobey Maguire kag Andrew Garfield.#
