Igapasa sang Department of Budget and Management (DBM) sa Kongreso subong nga adlaw, Agusto 11, ang ginaduso nga P7.2 trillion nga national budget para sa 2027.
Ini ang sais porsyento nga mas mataas ikumpara sa budget sini nga tuig.
Kahapon, pormal nga ginpresentar ni Budget Secretary Kim Robert de Leon kay President Ferdinand “Bongbong” Marcos Jr. ang proposed 2027 National Expenditure Program (NEP).
Suno kay Palace Press Officer Atty. Claire Castro, mangin prayoridad sa proposed budget ang edukasyon, ikaayong-lawas, palangabuhian, seguridad, kag pagpalig-on sang mga komunidad.
Ang tema sang proposed spending program para sa 2027 amo ang “People-Centered Growth for an Inclusive and Resilient Future.”
“Layunin nitong gawing mas kapaki-pakinabang ang bawat pisong pampublikong pondo sa pamamagitan ng mas mahusay na serbisyo at mas maraming oportunidad para sa mga Pilipino,” suno sa Palace official.
Ini nga proposed budget ang mas mataas sang P407 billion kun ipaanggid sa P6.793 trillion nga budget sini nga tuig.
Sa isa ka press release, ginpahayag sang DBM nga ang 2027 National Expenditure Program ukon NEP “nagabutang sa mga Pilipino sa sentro sang mga prayoridad sa paggasto sang gobyerno—paagi sa pagdiretso sang mga pampubliko nga resources para sa mga programa kag investment nga nagahatag sang oportunidad, nagapalig-on sang mga komunidad, kag nagapaayo sang kabuhi sang mga Pilipino.”
