Nagpabutyag si Atty. Lorna Kapunan sang pagkadismaya sa depensa matapos ginsiling sini nga wala nagtuman ang defense team sa nakasugtan nga pagkitaay nila para magkumparar sang mga dokumento sa impeachment trial.
Ginsiling ni Kapunan bilang counsel sang prosecution panel, nga “gin-indian” sila sang defense team matapos wala sila gilayon nagsabat sa ila nga text message kun san-o sila makitaay—Huwebes ukon Biyernes sang nagligad nga semana.
Suno kay Kapunan, 5:38 sang gab-i sang Huwebes lamang nagsabat ang depensa kag ginsiling nga available sila sa Agosto 14.
Ginpahayag ni Kapunan nga maathag ang direktiba sang presiding officer nga dapat sila nga magsugtanay sa petsa sang pagkitaay sang Huwebes ukon Biyernes.
Suno sa iya, wala na sang pulos ang Agosto 14 bangud subong nga adlaw ang trial.
Natublag man si Kapunan sa pahayag sang depensa nga wala sang direktiba nga Huwebes ukon Biyernes lamang dapat magsugtanay ang duwa ka kampo.
Para kay Kapunan, “bad faith” ang amo nga aktwasyon sang defense team.
Naglahog naman si Impeachment Court Presiding Officer Sen. Chiz Escudero kay House private prosecutor Atty. Lorna Kapunan matapos sini ginsiling nga wala sila nakabaton sang sabat halin sa defense panel kaangot sa plano nga meeting para sa pagkumpara sang mga dokumento.
Suno kay Escudero, maathag nga Huwebes ukon Biyernes sang nagligad nga semana ang gintalana nga adlaw para sa pagsinapol.
Pahayag ni Escudero, sa baylo nga “na-indian” si Kapunan, gin-ghost lang ini bangud wala siya ginsabat.
Sabat naman ni Kapunan nga gin-ignore ini.
Ginsiliing man ni House private prosecutor Atty. Lorna Kapunan nga gin-alegar sang defense team ni Vice President Sara Duterte nga kulang sila sa mga abogado gani wala sila nakatambong sa gintalana nga meeting kaupod ang House prosecution team sang nagligad nga semana.
Suno kay Kapunan nga nahatagan man sang kahigayunan ang depensa nga magtambong apang wala ini gintuman.
Suno kay Kapunan, nabatian nila sa isa ka interview nga indi bastante ang numero sang mga abogado sang depensa agud matigayon ang meeting kag masunod ang direktiba sang presiding officer.
Pahayag pa ni Kapunan nga 15 ang abogado sang defense team, apang ginrason gihapon nila nga wala sila sang bastante nga abogado ukon tiempo para makasunod sa direktiba sang impeachment court.
Sa bahin naman sang kampo ni Duterte, ginplastar ni defense counsel Atty. Kristine Ferrer nga indi na kinahanglan nga magkumparar sang dokumento bangud nagadepende sa korte ang pag-apresyar sang aunthenticity sang acknowledgement receipts.
Suno kay Ferrer, katungdanan sang prosecution panel nga pamatud-an kag ipakita sa pormal nga hearing ang competency sang mga testigo.
Dugang niya, nawad-an na sila sang kontrol sa mga dokumento humalin sang ginturn-over ini sa COA, gani sa Session Hall na ini dapat isa-isa nga pamatud-an.
