Nagluntad ang word war sa tunga nanday Senator Raffy Tulfo kag Senator Pia Cayetano sa session sang Senado, Agusto 11.
Ini matapos ang kritisismo ni Tulfo kay Minority Leader Sen. Alan Peter Cayetano nga ginapahayag wala nagkumpirma sa membership sang minority sa committee kun sa diin si Tulfo ang chairman.
Suno kay Senator Raffy, daw kaangay nga gina-hostage ang pending nga mga hagna bangud wala nagahatag sang “go signal” si Senator Alan sa committee memberships sang minority senators.
Pahayag pa sini, nakig-angot na siya sang nagligad pa nga sinemana kay Senate Majority Leader Juan Miguel Zubiri para sa election sang senators sa memberships sang Committee on Public Services kag sa Committee on Migrant Workers.
“What disturbs me is that it is the inaction of the minority floor leader to confirm these memberships that holds important LEDAC bills hostage,” suno kay Tulfo. “It is time that we cooperate so we might get back in legislating. If you have time to go FB Live then maybe you have the time to confirm or give the go signal to your minority members,” dugang niya.
Diri na kag ginmensyonar sini ang pagpang-“hostage.”
“I don’t know anong dahilan niya bakit niya hino-hostage yung pagiging members ng kaniyang mga kasamahan sa committee ko. Hino-hostage niya po yung mga LEDAC bills sa kaniyang pagtanggi na bigyan ng go signal ang kaniyang mga kasamahan sa minority para pumirma.”
Sa idalom sang rules sang Senado, dapat nga kumpleto ang committee memberships antes makapadayon sa trabaho ang tagsa ka panel.
Wala si Senator Alan sa session gani nga nagtindog ang iya utod nga si Senator Pia kag amo ang nagsabat.
Suno kay Senator Pia, pwede man kuntani nga palapitan siya kag pamangkuton kun may isyu nga gusto klaruhon si Tulfo kay Senator Alan.
Pahayag pa sini, sa 19 sini ka tuig sa upper chamber, wala pa siya sang nakit-an nga amo nga klase sang panghambal sang senador.
“Senator Tulfo, madali n’yo naman akong tanungin, alam n’yo namang kapatid ko si Alan kung may gusto kayong iparating. Huwag na ho kayo magdrama ng pa-hostage-hostage, hindi ho tayo ganito rito,” suno sa senadora.
Nagsabat pa gid liwat si Senator Tulfo, apang antes sina, nagsiling siya nga tapuson niya anay ang iya kadlaw. Ginklaro sini nga wala siya naga-drama kag nagabinutig.
“Never po ako nagdrama dito,” sabat sang senador. “Sino ang nagdadrama? Tumingin muna kayo sa salamin bago kayo magsalita.”
Nagpatunga naman si Majority Leader Juan Miguel “Migz” Zubiri kag nagsiling nga istoryahon sini si Senator Alan kaangot sa committee memberships. Gindugang sini nga indi maayo ang pamatyag sang minority leader.#
