Nagpangabay sang hospital arrest sa Sandiganbayan ang isa ka co-accused ni anay Ako Bicol Representative Zaldy Co sa kaso nga malversation matapos ini ma-stroke samtang yara sa detention.
Ini amo si Juliet Calvo, 64-anyos nga former chief sang Maintenance Division sang Department of Public Works and Highways-MIMAROPA.
Ginpasa ang motion sa Sandiganbayan paagi sa iya abogado.
Suno sa report, gindala sa ospital si Calvo matapos ma-stroke sang Agosto 5 samtang yara sa Women’s Dorm sa Camp Karingal.
Suno sa iya abogado, naparalisa si Calvo kag indi na makahambal apang stable man ang kondisyon sini.
Wala man ginbalabagan sang prosecution ang iya pangabay nga ibutang siya sa hospital arrest.
Ginmandu sang Sandiganbayan sa mga doktor ni Calvo nga mag-atubang sa korte kag maghatag sang report parte sa iya kahimtangan antes magpagwa sang desisyon ang korte sa iya motion.
May kaangtanan ang kaso sa ginapatihan nga substandard nga flood control project nga nagabalor sang P289-million sa Naujan, Oriental Mindoro.
Sang Hulyo 21, nagtindog si Calvo bilang testigo agud depensahan ang iya kaugalingon. Suno sa iya, ang iya pagpirma sa isa ka dokumento nga nagresulta sa pagpagwa sang pondo para sa ginapatihan nga anomalous nga proyekto isa lamang ka ministerial nga tikang.
Suno naman sa Korte Suprema, matawag lamang nga ministerial ang isa ka tikang kun wala ini nagakinahanglan sang “exercise of discretion or judgment” kag ginahimo lamang bilang pagsunod sa mandato sang isa ka legal nga awtoridad.
