Patigayunon subong nga Biyernes, Agusto 14, ang una nga public “truth-telling session” sang Philippine Truth Commission kaangot sa mga pag-abuso nga ginaangot sa drug war sang administrasyon ni anay Presidente Rodrigo Duterte.
Ini nga komisyon gintukod sang Catholic Church kag mga civil society organization.
Pagahiwaton ang sesyon alas-8:30 sang aga sa Pius Center sa Manila kag mahimo man ini malantaw live sa YouTube kag Facebook.
Suno kay Commission chairperson Raul Pangalangan, anay judge sang International Criminal Court ukon ICC, katuyuan sang sesyon nga mahatagan sang kahigayunan ang mga biktima nga maghambal kag mapabati ang ila mga eksperyensya.
Ginklaro ni Pangalangan nga indi prosecutorial ang katuyuan sang komisyon.
“Our goal is not prosecutorial. Our goal is to enable the victims to speak their truth, to enable the victims to be heard,” suno kay Pangalangan.
Suno pa sa iya, kun may matukiban nga importante nga impormasyon nga mahimo makabulig sa gobyerno, ipadala ini sa mga responsable nga government offices kag pati sa mga international organization.
“And in the course of our findings, if we determine that there are important facts that will be useful to the government, we will certainly send it to the responsible government offices and, in fact, not just the Philippine government but also international organizations,” dugang sini.
Ginpahayag ni Pangalangan nga lain ang sakop sang Truth Commission kumpara sa ICC bangud mahimo sini mapamatian ang mga biktima sang mga krimen nga natabo antes sang 2011 kag pagkatapos sang 2019, nga wala nasakop sang hurisdiksyon sang ICC.
Samtang, nakatalana sa Nobyembre 30 ang trial kay Duterte sa ICC kun sa diin nagaatubang siya sang tatlo ka counts sang crimes against humanity may kaangtanan sa iya drug war.
Base sa records sang gobyerno, indi magnubo sa 6,000 ang napatay sa kampanya kontra droga, samtang sobra 30,000 naman ang ginasiling nga napatay suno sa human rights groups.
