Patigayunon subong nga adlaw, Agusto 14, ang public consultation kaangot sa ginaduso nga hyperscale artificial intelligence (AI) campus sa Barangay Abilay Sur sa Oton, Iloilo.
Sa post sang Sangguniang Kabataan (SK) sang Abilay Sur, ginsiling nga ang konsultasyon magaumpisa 1:00 p.m.
“Ini nga assembly magatalakay kag magahatag sang impormasyon parte sa proposed Data Center nga pagatukuron diri sa aton barangay, lakip ang posible nga epekto sini sa aton komunidad kag palibot,” suno sa post sang SK.
Ginbutang man ang mga posible nga kaayuhan kag ang mga halit nga dal-on kun may yara sang data center.
Bangud isa ini ka proposal, ginpahayag sang SK nga importante nga magpamati kag magpamangkot agud nga makaangkon sang ihibalo sa isyu.
“Indi kinahanglan nga mangin “pro” ukon “anti” kita. Importante nga mahibaluan naton ang facts, magpamangkot, kag magpabati sang aton concerns agud masiguro nga ang development may benepisyo sa komunidad kag indi makadaot sa aton palibot,” pahayag pa sa ila nga Facebook post.
Sa separado nga statement ni SK Chairman Jay Magullado, iya ginpahayag nga himuon ang konsultasyon agud mabatian kag mahibaluan ang hunahuna kag panindugan parte sini nga proposal.
Ginklaro sini nga sila sa Barangay Council sang Abilay Sur, wala naga-ugyon sa amo proposal amo nga nagpatigayon sang consultation para mabatian ang tingog, concerns, kag opinyon sang tanan.
Pahayag sini, naga-research kag naga-usisa sila sang mga posible nga epekto sini sa mga pumuluyo, ilabi na sa ila barangay nga amo mismo ang gina-propose nga venue.
“Pero nakita ko ang iban nga comments nga daw nag-agree na kami sa proposal. Para klaro lang, kami nga Barangay Council sang Abilay Sur, indi kami nag-agree sini nga proposal. Amo gani nga nagpatigayon kami sini nga consultation para mabatian ang tingog, concerns, kag opinion sang tanan,” suno sa SK chairperson.
Ang hyperscale AI campus isa ka large-scale, purpose-built data center facility nga ginadesinyo agud nga maka-akomodar sang high-density computing infrastructure kag daku nga electrical demand. Sarang ini nga makasuporta sang AI training kag inference, cloud computing, kag iban pa nga data-intensive nga trabaho.
Sa post naman ni Oton Vice Mayor Jose Neil Olivares subong nga aga, ginklaro sini nga wala sang gina-endorso ang Sangguniang Bayan agud nga tugutan ang isa ka Norwegian company nga magtukod sang data center sa Abilay Sur.
“Palihog indi ninyo anay paghusgaran ang komitiba ukon ang bug-os nga Sanggunian,” pahayag sini.
“Aton ginapasiguro sa mga natungdan nga pumuluyo nga aton tun-an sing maayo ang tanan nga anggolo kag implikasyon [ pros and cons] antes kita maghatag sang desisyon sa sini nga proyekto,” suno sa bise alkalde kaangot sa public hearing nga himuon karon sa hapon.#
