Nagpanawagan ang Cybercrime Investigation and Coordinating Center (CICC) sa publiko nga indi na mag-repost ukon magpalapta sang video kaangot sa natabo nga pagpangluthang sa sulod sang Ateneo de Zamboanga University-Tumaga Campus.
Suno kay CICC Undersecretary Renato Paraiso, padayon nila nga ginamonitor ang mga aktibidad sa social media nga may kaangtanan sa insidente lakip na ang nagalapta subong nga mga footage.
Pahayag sini, nagapakig-angot na sila sa Meta kag iban pa nga social media platforms nga i-take down ang amo nga content agud nga indi na makatuga sang panic kag indi na makabilin pa sang ano man nga impluwensya sa iban nga netizens.
“Nananawagan kami sa inyo na huwag na pong i-repost ang video kaugnay ng insidente upang hindi na rin mabigyan ng karagdagang audience or attention ang ganitong uri ng karahasan,” suno kay Paraiso.
Ginpangabay man ni Paraiso sa mga ginikanan nga tutukan kag bantayan ang online activities sang ila mga kabataan, ilabi na ang mga menor de edad nga nagagamit sang social media kag gaming platforms.
Importante man, suno sa opisyal, ang bukas nga komunikasyon sa sulod sang panimalay agud mahibaluan sang mga ginikanan kun ano ang ginatan-aw, ginasubaybayan, kag gina-consume sang ila mga kabataan online.
“Panatilihin natin ang bukas na komunikasyon sa ating mga tahanan. Alamin natin kung ano ang kanilang pinapanood, sinusundan at kinokonsumo online,” dugang sini.
Nahibaluan nga duha ka tawo ang napatay sa amo nga school shooting kaina sang aga—isa ka Grade 10 nga estudyante kag ang mismo nga shooter nga estudyante man sang amo nga buluthuan.
Base sa inisyal nga pahayag sang kapulisan, ginapahayag nga nakasulod sa eskwelahan ang suspek nga may dala nga duha ka armas lakip ang regular pistol kag isa nga may conversion.
Antes nagpanginmatay ang suspek, gin-live stream mismo sini ang insidente sa first-person point of view nga talalupangdon nga daw kaangay sang presentasyon sa isa ka video game.
Gina-usisa na subong sang awtoridad ang iya gaming kag chat history agud nga matul-id ang iya motibo sa amo nga krimen.#
