Ginkwestyon ni Majority Floor Leader City Councilor Rex Marcus Sarabia ang pagpasar sa first reading sang proposed pedestrian ordinance ni Councilor Sedfrey Cabaluna.
Kasunod ini sang ginpatigayon nga 32nd regular session sang 12th City Council kahapon, Agosto 19.
Suno kay Sarabia, bilang majority floor leader kag kaupod ni Vice Mayor Lady Julie Grace Baronda sa pagpabilin sang order sa plenaryo, katungdanan nya nga ipatuman ang parliamentary courtesy sa mga miyembro sang City Council.
May kaangtanan ini sa pagpunto sang Konsehal nga indi pagpasaron ang “Pakdol” ordinance ni City Councilor Cabaluna kasunod sang viral video sang pagpakdol sang isa ka lalaki sa rider nga wala nagpondo bisan pa nga may nagatabok nga mga tawo sa pedestrian lane.
Pahayag ni Sarabia, may yara na sang existing ordinance kag national news nga naga-regulate sa mga pedestrian nga ginakabig substantial redundancy.
Ginpahayag man ni Sarabia nga nagrekomendar man si Councilor Jose Maria “Nene” Dela Llana sang duha ka traffic ordinances apang ginbalabagan ini ni Cabaluna.
Gani, ginakwestyon ni Sarabia ang pagpadayon sang nasambit nga ordinansa bangud suno sa iya, inconsistent ini sa nauna nga gin-establisar nga parliamentary precedent sang konseho.
Suno sa iya, indi ini maayo bangud kon may nauna na nga rekomendasyon kag precedent nga indi pagpasaron ang isa ka proposed ordinance, dapat ini nga sundon kag respetuhon pinaagi sa masunod nga proseso.
Pagkatapos sang deliberasyon, ginsuportahan naman sang konseho, kalakip na sanday Sarabia kag Dela Llana, ang amo nga ordinansa tubtob napasar sa first reading.
