Ginpanindugan sang Office of the Ombudsman nga wala sila nagasalig lamang sa isa ka testigo sa ila imbestigasyon batok kay former House Speaker Martin Romualdez.
Ini may kaangtanan sa alegasyon sang korapsyon sa mga proyekto sang flood control.
Suno sa Ombudsman, isa ka “classic pressure tactic” ang pagbawi sang testimonya sang mga testigo ilabi na sa mga high-profile nga kaso.
Ginpahayag ini sang Ombudsman matapos ginbawi sang retired Marine nga si Orly Guteza ang iya nauna nga testimonya nga naga-angot kay Romualdez sa ginakabig nga mga iregularidad sa mga proyekto sang flood control.
Ginbulgar sang anti-graft body nga may 28 ka aktibo kag uniformed personnel nga ginapreparar agud maghatag sang direkta kag importante nga impormasyon may kaangtanan sa mga transaksyon sang former Speaker.
Ginpahanumdom man sang Ombudsman nga ang pagkooperar sa imbestigasyon isa ka legal nga obligasyon kag indi lamang personal nga desisyon.
Nagpaandam ini nga ang sin-o man nga magtinguha nga magpanghilabot, magpugong ukon magguba sa imbestigasyon ang magaatubang sa bug-os nga puwersa sang kasuguan.
Matandaan nga sa pag-retract ni Guteza sa iya nauna nga mga testimoniya, ginsiling sini nga ginpwersa siya ni detained Senator Rodante Marcoleta kag former Rep. Mike Defensor nga maghimo sang mga akusasyon batok kay Romualdez.
