Nag-updanay sa panyapon sa balay ni Mayor Raisa Treñas sanday Iloilo City Councilors Rex Marcus Sarabia, Nene dela Llana, kag Sedfrey Cabaluna.
Nakit-an ini sa post ni Councilor Dela Llana kagab-i kag subong nga adlaw kun sa diin kaupod nila ang iban pa nga mga konsehal kag ang alkalde.
Talalupangdon ang amo nga post ilabi na bangud ginpatigayon ang dinner kasunod sang tensyon sang nagligad nga regular session sang Iloilo City Council sang Myerkules, Agusto 19.
Matandaan nga sa amo nga sesyon, ginkwestyon ni Majority Floor Leader Councilor Sarabia ang pagpasar sa first reading sang ginaduso nga pedestrian ordinance ni Cabaluna.
Ginpahayag man ni Sarabia nga si Dela Llana ang nagrekomendar man anay sang duha ka traffic ordinances apang ginbalabagan ini ni Cabaluna.
Suno kay Sarabia, ang pagpadayon sang proposed ordinance inconsistent na sa gin-establisar nga parliamentary precedent sang konseho.
Namensyonar man ni Sarabia nga daw kaangay nga ginbasura ni Cabaluna ang proposal ni Dela Llana agud nga maka-propose man ini sang iya ordinansa. Daw kaangay ini suno sa iya nga gin-“laglag” ang iya upod kag daw indi gid maayo nga leadership ilabi na nga siya ang kandidato sa pagka-vice mayor.
Apang sa latest post ni Dela Llana, makit-an nga may caption ini nga “𝑯𝒂𝒑𝒑𝒚 𝑻𝒉𝒖𝒓𝒔𝒅𝒂𝒚” kun sa diin kaupod sini sanday Cabaluna, Sarabia, Councilor Miguel Treñas, kag Mayor Treñas.
Sa interview sang Bombo Radyo kay Dela Llana, iya ginpahayag nga nakaandan na nila nga maka-isa ukon makaduha ka beses nga magpanyapon sa balay sang alkalde kada bulan.
Sa impormasyon nga nakuha sang Bombo Radyo, ginpatawag ang amo nga mga konsehal agud husayon kasunod sang hitabo sa sesyon sa konseho sang Myerkules. Ginatinguhaan sang Bombo Radyo nga makuha ang dugang nga detalye kaangot sa naistoryahan sa amo nga pagsinapol kag dinner.
