Indi hungod nga nabuno sang isa sa mga suspek ang iya upod sa nagluntad nga inaway sa Barangay Zamora Melliza, City Proper gab-i sang Agosto 20.
Sa interview sang Bombo Radyo kay Police Captain Melchor Tolentino, officer-in-charge sang Iloilo Police Station 1, iya ginpahayag nga sang nagalakat ang biktima upod ang iya nga nobya, hinali nalang ang mga ini ginlambatan sang apat ka mga kalalakihan.
Gintuyo sang mga suspek nga bun-on ang biktima, apang nakita ini sang iya nobya kag nasagang.
Nakadalagan pa ang lalaki, apang ginlagas siya sang apat ka mga pamatan-on kag naabutan sa isa ka tyangge sa nasambit nga lugar, kun diin natabo ang stabbing incident.
Pahayag pa ni Tolentino nga didto ginpulihan buno sang apat ka mga suspek ang biktima, apang aksidente nga naigo sang isa sa mga suspek ang iya kaupod.
Napaidalom na sa operasyon ang 17-anyos nga ginpulihan buno un sa diin may duha ka pilas sa dughan kag pilas sa tiyan.
Naka-schedule naman nga ipaidalom sa operasyon ang 16-anyos nga aksidente nga nabuno sang iya kaupod.
Dugang pa diri may posibilidad nga pagpanghangkat sang away ang rason sang insidente.
