Posible nga mag-atubang sang katumbas nga administrative penalty ukon criminal case ang isa ka pulis kun mapamatud-an nga may negligence sa pagdumala kag pag-secure sang iya firearm.
Sa interview sang Bombo Radyo kay PCOL Romeo C. Galgo Jr., Acting Chief sang Regional Civil Security Unit 6 ukon RCSU6, iya ginpahayag nga nagadepende ang proseso sa kun ang armas gin-isyu sang PNP ukon personal nga ginbakal sang pulis.
Ginpahayag ni Galgo nga ang mga firearm nga gin-isyu sang PNP yara sa pagdumala sang Regional Logistics and Research Development Division kag Regional Supply Accountable Office (RSAO), samtang ang mga personal nga ginbakal nga armas yara sa sakop sang Regional Civil Security Unit.
Suno sa iya, ginamanduan ang mga pulis nga dal-on kag bantayan ang ila armas samtang naka-duty, kag i-secure ini sa safety deposit box ukon iban pa nga storage nga indi basta-basta maabot sang iban nga tawo, lakip na ang mga kabataan.
kon off-duty.
Apang gin-athag ni Galgo nga indi awtomatiko nga makasuhan ang isa ka pulis kon ang iya firearm makuha ukon makawat nga wala niya nahibaluan, ilabi na kon may balido siya nga rason kag mapamatud-an nga wala siya negligence.
Sa idalom sang Republic Act No. 10591, ukon Comprehensive Firearms and Ammunition Regulation Act, ginahatagan importansya ang husto nga pagdumala kag pag-secure sang mga firearm.
Samtang, kon mapamatud-an nga may kapabayaan ukon negligence ang pulis nga nagtugot nga madula ukon makuha ang iya armas, posible ini nga magresulta sa administrative kag criminal charges, suno sa opisyal.
